Home Loan Tips: घर हे फक्त चार भिंतीचं बांधकाम नसतं, ते असतं आपल्या स्वप्नांचं घर… पण या घराच्या स्वप्नात अडथळा येतो तेव्हा, जेव्हा आपल्या हातात एकाचवेळी लाखो रुपये नसतात. शहरांमध्ये घर घेणं म्हणजे खूप मोठा खर्च. प्रत्येकाच्या हातात घराची पूर्ण किंमत देण्याइतकी रक्कम नसते, त्यामुळे अनेकांना होम लोन घ्यावं लागतं. सध्या भारतात गृहकर्ज 8.10 ते 12 टक्के व्याज दराने मिळतं. पण कर्ज घेताना काही महत्त्वाच्या गोष्टींची जर योग्य काळजी घेतली नाही, तर पुढे आर्थिक अडचणींचा डोंगर कोसळू शकतो.
गृहकर्ज घेताना काय काळजी घ्यावी?
गृहकर्ज (Home Loan) ही गोष्ट एकदा घेतली की आयुष्याच्या अनेक वर्षांपर्यंत आपल्या रोजच्या कमाईचा एक भाग कर्जाच्या हप्त्यांत जात असतो. त्यामुळेच कर्ज घेण्यापूर्वी आपल्या आर्थिक स्थितीचा नीट विचार करणं खूप गरजेचं आहे. सगळ्यात पहिलं म्हणजे तुमच्याकडे किमान ५ ते ६ महिन्यांच्या पगाराएवढा आपत्कालीन निधी असावा. कारण, कर्जाचा कालावधी हा १५ ते २० वर्षांचा असतो आणि या काळात काहीही अनपेक्षित प्रसंग ओढवू शकतो. अशा वेळी हा आपत्कालीन निधी तुमचं रक्षण करतो.
घर खरेदी करताय? अंडर कंस्ट्रक्शन की रेडी टू मूव्ह? बघा कुठे लागतो कर आणि कुठे मिळते सूट!
दुसरी महत्त्वाची गोष्ट म्हणजे घर घेण्याआधी तुमच्याकडे घराच्या किंमतीपैकी किमान २० टक्के रक्कम डाऊन पेमेंटसाठी असावी. यामुळे तुम्हाला कर्जाची रक्कम कमी घ्यावी लागेल आणि हप्त्यांमध्ये थोडा दिलासा मिळेल. तिसरी अत्यावश्यक बाब म्हणजे, ईएमआय म्हणजे हप्त्याची रक्कम तुमच्या पगाराच्या ४० ते ५० टक्क्यांपेक्षा जास्त नसावी. जर हप्ते जास्त झाले, तर आयुष्यातील इतर गरजा पूर्ण करताना तडजोड करावी लागेल, जे खूप त्रासदायक होऊ शकतं.
५० लाखांचं गृहकर्ज घेतल्यास किती हप्ता द्यावा लागतो?
समजा एखाद्या व्यक्तीनं ५० लाखांचं गृहकर्ज २० वर्षांसाठी ९ टक्के व्याजदराने घेतलं, तर दरमहा सुमारे ४४,९८६ रुपयांचा हप्ता भरावा लागेल. या पूर्ण कालावधीत त्याला ५७ लाख ९६ हजार ७११ रुपये फक्त व्याज म्हणून द्यावे लागतात. म्हणजेच एकूण परतफेडीची रक्कम सुमारे १ कोटी ७ लाख ९६ हजार ७११ रुपये इतकी होते. जर व्याज दर ८.५ टक्के असेल, तर हप्ता थोडा कमी म्हणजे ४३,३९१ रुपये भरावा लागतो.
पुण्याच्या या भागात चुकूनही घेऊ नका भाड्याने घर; भाडे ऐकून बसेल धक्का..!
या आकड्यांवरून स्पष्ट होतं की, कर्जाची रक्कम आणि व्याज यांचा आपल्या आर्थिक जीवनावर मोठा परिणाम होतो. त्यामुळे कर्ज घेण्याआधी सर्व बाजूंनी विचार करणे अत्यंत गरजेचे आहे.
फ्लोटिंग की स्टॅटिक व्याजदर – काय योग्य?
गृहकर्ज घेताना व्याजदर कसा आहे हेही जाणून घेणं महत्त्वाचं आहे. स्टॅटिक व्याजदर म्हणजे पूर्ण कर्जाच्या कालावधीत एकच व्याजदर लागू राहतो. तर, फ्लोटिंग व्याजदर वेळोवेळी बदलतो. जर रेपो रेट (REPO Rate) कमी झाला, तर फ्लोटिंग व्याजदराचा फायदा होतो आणि हप्त्यांची रक्कम कमी होते. पण, रेपो रेट वाढला, तर त्याचा थेट फटका तुमच्या खिशाला बसतो. त्यामुळे कोणताही निर्णय घेताना तुमच्या आर्थिक स्थितीला साजेसा पर्याय निवडणं गरजेचं आहे.